Hai nueches pa
domir diendo una pa la cama coles pites, hai nueches pa sentase a la lluz de la
lluna y pensar y hai nueches pa soltar la melena y dir con orgullu y devoción a
la ceremonia del blues. Esta última fue la que
disfrutamos en Valles, nuna nueche que mos enllenó de color, ritmu, fumu y blue
notes. Y tou ello multiplicáu por dos, gracies a la presencia ena sala de “Trash
Tornados” y “Johnny Big Stone & The Blues Workers”, bandes que supieren
sumar fuerces pa ofrecer a los ellí presentes una verdadera ofrenda al blues y
a los soníos con raigañu americanu como’l jazz, el swing y el rock’n’roll. Tou
un remolín de soníos, sentimientos y buena música.
Abrió la nueche la
banda de Mieres ‘Trash Tornados’, seis años depués de la so primer actuación ena
sede, de la que ya guardábamos buenos recuerdos. El cuartetu, lideráu pol
inigualable Bobby Gonzalez a la guitarra y la voz, complétase con Pibli a la
batería, Kiko Flores al saxofón y Pablo Souto al contrabaxu. Presentarenmos el so últimu
discu Voodo girl, una españíu de
swing, blues y rockabilly, que defendieren con una entrega total n’ escenariu.
La simpatía y complicidá de Bobby col públicu y cola so propia xente calttuvo
un pulsu vibrante durante tou’l conciertu, llenu de temas mui bailables,
frescos y bien armaos. Ena base rítmica rescampló un Pibli absolutamente
enorme, bruxu del ritmu y el compás, toupoderosu cutiendo unos timbales que paecíen
talmente provenir del mismu corazón del continente africanu. Una presencia
envolvente y electrizante la de esta batería que marcó los tiempos y a los que
la banda se sumaba con precisión. La guitarra elegante de Bobby y una voz de
eternu rapaz contrastaren cola contundencia del saxo de Flores, que nun cesó de
dar candela en cada tema, encendiendo bien a los allí presentes con una mezcla
de energía y sensualidad a partes iguales. Un show llenu d’allegría, gayola,
fuerza y descaru n’escenariu, que disfrutamos y bailamos con bises y desfile pela
sala incluíu.
A partir de unos
mimbres ortodoxos, el trío de Johny Big
Stone, como segundu platu y postre, supo facer un soníu mui personal, que mos somorguió enos aires más canallas y
lacerantes del blues. Al frente, un magnético Johny, que nos prendó con una voz resgada y escura, enllena
de matices, y una guitarra experta, que
fue afilvanando melodíes y solos con gran brillantez. Sorprendiómos el gran
Little Jordi contrabaxista llaboriosu, con un par de solos de armónica
arrolladores, desatando el aplausu del públicu, que nesi momentu taba ya
embelesáu y adomáu. Gran presencia de esti tríu que lleva años de rodaxe al
llombu y domina el conceptu y la execución ensin grandes espavientos ni
esparabanes, con un sentimientu profundu y que se pega.
En defintiva, pa
que contavos más, namás concluir diciendo que fue otra nueche brillante y mui
bocanegra que y que mos llevó munchu’l dala por rematada. Ye la bruxería de
Valles, solo el que lo vive lo sabe. ¡Hasta pronto!
